يا الطيب ..

كله لأن انا الطيب/ة

يمكن هالمرة كثير من الناس تعارض الكلام اللي بقوله.. لان ما بيعجبهم  الكلام بس يمكن أخليكم تجوفون الشي من منظور ثاني.. خلنا نسميه "إيجابي" ..

لما تضيق فينا الدنيا و نحس ان ما في احد حوالينا ...  لما نطيح بمشكله مع شخص.. لما نحس ان في ناس تكلمنا بس لما تحتاجنا ... لما ما نعجز  نقول لاء .. لما نسأل و ما يسئلون عنا.. 

شنقول؟ 

كله بسبة شنو؟ بسبب طيبتي.. كله لأن انا طيب/ة .. ما يسوون فيني جذي الا لأن انا طيب/ة.. 

تعال عاد احين  اقطع العلاقات و صير إنسان قاسي.. ليش انزين؟ لأن انا طيب/ة و ما ينفع ويا الناس الا الانسان القاسي..

.. ليش يكون الواحد طيب؟ 

عشان نفسي!

ليش ابني توقعات؟

ليش اسوي شي و انتظر المقابل ؟ 

لا شعوريا، قاعدين نضيع لذة العطاء في طيبتنا..

ان كنت طيب، خلك طيب حق نفسك مو حق الناس.. 

إحسنوا نواياكم ، جددوها و خلوا الله اول و آخر همكم..

خلكم مسامحين، المسامح كريم ..

بتقولون لي ليه متى؟ بقول لكم لي آخر يوم ب حياتكم .. لأن كلنا نبي نروح و إحنا تاركين شي في قلوب الناس .. 

ما بنروح بعيد و لا بناخذ مثال صعب.. بس تذكروا الرسول و كل المواقف اللي كان يسويها..

يأس من الناس عليه الصلاة و السلام؟ 

ولا وقف يدعوا للأسلام و ما قام يصير طيب؟ 

و اختمها بدعائه لما اهل الطائف عذبوه و رموه بحجارة لما كان يدعوهم للهداية..  

( اللهم إليك أشكو ضعف قوتي وقلة حيلتي وهواني على الناس ، يا أرحم الراحمين ، أنت رب المستضعفين ، وأنت ربي، إلى من تكلني ؟ إلى بعيد يتجهمني ؟ أم إلى عدو ملكته أمري ؟ إن لم يكن بك علي غضب فلا أبالي ولكن عافيتك هي أوسع لي ، أعوذ بنور وجهك الذي أشرقت له الظلمات ، وصلح عليه أمر الدنيا والآخرة من أن تنزل بي غضبك أو يحل علي سخطك ، لك العتبى حتى ترضى ، ولا حول ولا قوة إلا بك ) .

"مَنْ عَمِلَ صَالِحًا فَلِنَفْسِهِ ۖ وَمَنْ أَسَاءَ فَعَلَيْهَا ۗ وَمَا رَبُّكَ بِظَلَّامٍ لِلْعَبِيدِ"