ابي اعيش حياتي بس .. ؟

ساعات نقول ان الحياة ما بنعيشها الا مرة .. 

نقص على نفسنا عشان نعطي روحنا فرصة نغلط .. 

و لما نفكر في الشي اذا نبي نسويه او لا، نفكر بحجم الوناسة اللي يمكن تطوفنا اذا ما سويناه.. 

و اللي يضحك فينا، ان عندنا دين نتبعه بيعيشنا احسن عيشة.. مو بس في الدنيا، في الآخرة بعد.. عندنا دين يوجهنا و يخلينا نختار الصح.. 

عايشة في غربة بآخر الدنيا.. بروحي، و اقدر اسوي كل اللي ابيه و لا احد'ن شاف ولا درى.. انزين شنو ذي الشي اللي موقفني؟ مخليني اعرف الأشياء اللي لازم اسويها و ما اسويها؟

 

اول شي اني آخر انسانة تفكر من جاف او ما جاف بس اعرف ان في احد يراقبني و عطاني كل الثقة و الخيار في حياتي رغم انه وجهني ب كل شي.. ربي 

ثاني شي .. يقول الرسول عليه الصلاة و السلام : "يبعث كل عبد على ما مات عليه" 

يعني شنو؟ يعني اللي كنت تسويه قبل لا تموت.. هو اللي بتحشر عليه في يوم القيامة.. ناس بتحشر ساجدة، ناس تقرا القرآن، صايمة، تشرب خمر و و و و ... 

انزين شلون انا ابي أموت؟ 

يومها ما في شي في الحياة بيفيدنا غير اللي سويناه حق ذاك اليوم .. 

شسوينا؟

الواحد ما يعرف متى يومه متى الله كاتب له يترك الدنيا ..

الحياة اختبار في الدنيا و نتايج في الآخرة..

لا تحرم نفسك من كل شي بس لا تسوي كل شي... حلو الواحد يعيش حياته بس عيشها صح.. 

لما اقول ابي اعيش حياتي .. مو يعني اغلط في حياتي.. يعني احبها، استانس فيها و انا مرتاحة من نفسي..

انا مو داعية.. ولا كاملة و معصومة عن الغلط.. بس هاي الشي اللي يساعدني اتخذ قراراتي و ما ابي احرمكم منه و عساني ذكرتكم ب شي يهمكم .. و ذكر فإن الذكرى تنفع المؤمنين..

و اذا في شي غلط قلته، صححوني ..

و اللي عنده طريقة افضل و لا نصيحة اقوى لا يحرمنا منها.. 

Maryam Baslar

Email : maryam.baslar@gmail.com

Twitter : @MariamBaslar

Instagram : @MaryamBaslar

Ask.fm : ask.fm/Maryambaslar