#قعدوا_في_بيوتكم ..
مو هاشتاق طلعه الشعب وبينساه، بل قرار دولة ومسؤولية كل مواطن.. مو بس بحريني، الا دولي بعد..
توقف كل شي بإذن الله وقدره، وما أُبتلينا به إلا بحكمة من الله سبحانه..
ما ودي اتكلم في موضوع المرض ولا اقنع احد يقعد في البيت.. بس، يايه اشارككم تجربتي في هالفترة اللي ما انتهت، وأعطيكم نظارتي تلبسونها، لعل تنظرون للأمر من زاويتي او زاوية افضل ان شاء الله..
قبل اسبوع او زود مع الأخبار والإشاعات والخوف والهلع، قررت اصك الانستقرام والسناب جات عشان سبب واحد بس.. حده بس والله، خلاص.. من قلب خلاص!
ومو من طبعي احب اقعد بليا شغل.. متعوده اقرا والحمد لله دروسي ما زالت قائمة.. بس الوقت الفاضي اللي عندنا مو طبيعي..
قررت انزل ابلكيشن فيه وايد دورات، وقعدت اتعلم اشياء وايد من زمان خاطري اجربها.. منها الالوان المائية، التطريز، وبعض المهارات الحياتية بعد حتى شلون استخدم حساب الانستقرام خذت دوره فيه. وفي ملايين الدورات المجانية في كل المجالات.. كل شي تقدرون تتعلمونه اونلاين.
ودايماً كنت اقول حق طلابي (ونفسي اولاً) عمركم ما بتعرفون شنو تحبون وشنو تبون تحققون الا اذا جربتوا كل شي، والأشياء اللي ما تحبونها اول. دايماً نمنع نفسنا من وايد اشياء بحجة ان ما نعرف او ما نحب، بدون ما تحط نفسنا في الاختبار ونتعرف عليها اكثر. ابتدو بآخر شي توقعتوا تسوونه..
وقعدت افكر، ترى من مسؤوليتي الوطنية.. مو بس ان اقعد في البيت وخلاص.. هاي الوقت محسوب علي، مو بس اليوم، باجر وفي الآخرة بعد! شسويت فيه؟ رقدت؟ جفت نتفلكس؟ كليت؟ طبخت؟ وبعدين؟
اذا في شي واحد اقدر اتعلمه واخدم فيه نفسي ووطني، هاي وقتي.
اذا في شي واحد طول عمري ابي اسويه واتعذز بالوقت، هاي وقتي.
اذا في امور معفوسه وصايره فوق تحت، هاي وقتي اضبطها.
كمية الصرف، مضيعة الوقت، الاستهتار وعدم ترتيب الأولويات اللي كنا عايشينه قبل هالازمة.. اليوم لازم نراجع نفسنا فيها.
وباعطيكم اياها من الآخر.. اذا بنقعد جذي بدون ما نتزحزح.. ما بنوصل حق شي..
طلعوا ورقة، كتبوا الاشياء اللي ودكم تسوونها (لا تكتبون وايد لان انا اشتطيت وكتبت الف شي وما قدرت عليهم لان ما عندي وقت) خلها تكون على قدكم، start small, مثل ما يقولون.. واستغلوا وقتكم.. تعلموا شي، اقروا القرآن، تدبروه، سووا رياضة.. نفعو نفسكم بشي.
هاي الكلام وجهته حق نفسي قبل لا اوجهه لكم.
الوطن بيحتاجنا نرفعه اكثر بعد ما هالازمة تعدي بإذن الله، خلك جاهز.
باحط لكم كل شي اعرف عنه في حسابي في الانستقرام:
@MaryamBaslar
